بوقالات..........
حبطت لقاع الجنان ويدي موشية
حليت باب الرياض بكفوف يديا
القمر يقول نكشف والسحاب يقول ذنوب
خلي الحبيب مع الحبيب حتى يجوز المكتوب.
عينيك زروقة وحواجبك زادوا مشقة
وخدودك مطبقة عليهم الورد فاتح
ضربتني ضربة لابانو الجراح
وقلبي راه عندك ما لقيتلو مفتاح
كان الزهور في جناني والحسد عند جيراني
وأنا فرحانة بزماني ونومي نوم الهاني
والآن ياعباد الله شفتوا كاش راني
مالي ربي بلاني بحب ذاك البراني
حكمت الطير بتكة الحرير
ما ظنيتو يطير بعدما يوالف
خلى قفصي وعمر قفص الغير
هذي حالة الزمان يواري ويخالف
يا غصن مردقوس يالمربي عالفشوش
يالي عايش في الجنة يالي ما تحمل هانة
ياربي يا رحمان فرج عليا أنا
طاقة لطاقة وطاقة لا تواريها
سلموا على الحبيبة اللي قاعدة فيها
نجيب كاس الذهب ونجي نسقيها
نرفد الغزالة من الحومة ونهرب بيها
رديت بابي دفة على دفة
وطويت فراشي لفة على لفة
أنا سعدي شمعة محال تنطفى.
خرجت من فاس في يدها فردة مقياس
الجوهر والأخراص من تحت وذنيها
خرجت ذيك العروسة ولابسة ذاك اللباس
اللي عندو 100 و1000 يجي يديها
واللي ماعندوش ما يطمع فيها
جايز على باب دارنا ويصيح يا مملوك
قالي يا لالة ما يشريني بوك
قوتلو ما يشريك والحر ما ينباع
طعم الذهب للذهب وما تكونشي طماع
قالي نخدم عليك ونصرف الغالي
على بنت الرجال نخسر جميع أموالي
زهرتي في الكاس كل ليلة بيها وناس
كي نشوفها في منامي ما يضيق بيا الحال
كي نشوفها في الصباح قلبي يرتاح
جاري يا جاري بنتك شعلت ناري
راني جاي للبيت نقصد الحديث
جايز على باب الدار يفرش فالورد
والورد ما ينعفس والشوك ما ينباس
والهم ما يرفدوه غير بنات الناس
بيني وبين الحبيب رمية وتفاحة
تفاحتي من ذهب وفي راسها بلبل
البلبل على الساقية يولولو
واللي يحب الخد الأحمر ربي يكملو
أنت صبيبيط وأنا خويط فيه
أنت سلسلة وأنا خميسة فيه
أنت خويتم وأنا حجيرة فيه
إذا أنت تحبني أنا نموت عليك
والطريق اللي تاخذها أنا نكون فيها
العشق في دارنا والعشق ربانا
والعشق في بيرنا حتى حلا ماءنا
العشق محبقة حتى رمات الغصان
العشق ما ينحيه لا قاضي ولا سلطان
حبطت لقاع الجنان وفرشت زربية
وحرقست بحرقوس ذهب حتى لوذنيا
والطبق بين رجليا والخاتم بين يديا
أفرحي يا يما سعدي ولا ليا
نتشفا فالعدو كيما تشفا فيا
يال قاعدة فالرياض وادور فوطتها
والحسن والحسين عند ركبتها
شافها الوزير قال ناخذها
شافها السلطان قال نغنيها
للرب الكريم الرحمان عساس عليها
برنوسك وافي وعلامك صافي
والله ما ترجع للبلاد اللي منجلها حافي
يا مالكتيني بزينك يالزايدة في عذابي
في الليل انومك وفي النهار نترجى فيك
اعطيني كلمتك يرحم اللي رباك
يا مولاة القلب الأبيض ربي يكملك
حوت جميع البلدان مالقيت مثلك
العين في العين والتاقة للتاقة
ما تعيا القلوب تتلاقا
شبهتك بالقهوة خفيفة مثلك
روينة كيعقلك حلة كي وجهك
أما كي تجي مرة فهيا كيما فراقك
وقفت على بابكم وعجبني طعامكم
الناس حسدوني وأنا قلبي حصل عندكم
بهواك ديما مهموم وما نرقدش
قريت كل العلوم وفي رضاك نترجى
في السما ندير سلوم ونطلع درجة بدرجة
ونجيب عقد النجوم يعود مهرك يالجبيبة
قاعد تحت تاقتها نتفكر في ضحكتها
العين شافتها والقلب عشقها
يالراقد عالحصير والدموع في عينيك
الفارس جا يسير وابن السلطان يديك
لالة من والى يا عرجون الدالى
سبع أيام وسبع ليالي ماذقت نعمة وما تحلالي
ماعرفتش إيلا من عشقي ولا هبالي
إيلا أنت بحر أنا حوتة فيك
إيلا أنت جنان أنا وردة فيك
إيلا أنت ورقة أنا رسمة فيك
إيلا أنت تحبني أنا نموت عليك
كنت كي الوردة مذبالة
جا حبيبي وغير الحالة
الحب راه كواني ودواه راه شفاني
السفينة لي جات باش نكافيها
باللوز والسكر نطعم غاشيها
وبالزباد والعطر نطلي سواريها
ونطلب ربي العزيز للج يديها
بعثتلك هدية داخل الهدية وردة
داخل الورة قلب داخل القلب نحبك
باسم الله بديت وعلى النبي صليت
وعلى الصحابة رضيت وليك ريت (شفت)
ارفدت بريقي وتوضيت وربي حققلي ماريت
ريتك للحرم مشيت لمكة حجيت
في مسجد النبي صليت على عرفات وقفت
وبين الصفا والمروة طفت والنبي زرت
والملائكة ليك شهدت والر ضا من الله اديت
ومن الرسول تقربت والجنة سكنة
ومحبة الناس كسبت وطموحاتك تحققت
في دار السلطان زاد سروركم وراحوا همومكم
في وسط الجنانين تفتحوا زهوركم
وفي هذا اليوم زالوا ذنوبكم
الله يحميك وفي السما يعليك
وللناس اللي يحبوك يخليك
ومن الناس اللي يكرهوك ييبعدك
ولي تطلب يعطيك وعالاستقامة يثبتك
وبرضاه يتمملك وبالجنة يزكيك