الحب [ رسالة لمن يفهمها ] !

السلام عليكم

بسم الله نبدأ

ما معنى هذه الكلمة الرائعة ( الحب )

الحب هو شعور يضعه الله عز وجل في قلوب عباده و القلوب ليست بيدينا بل بيد الله عز وجل و بين اصبعيه يقلبها كيف يشاء

الحب = الاحترام

اذا ذهب الاحترام ذهب الحب

كتير نسمع شبابنا الآن يقولو ( ابغى وحدة حلوة و بيضة و زي القمر ) ... بكرى هاد كلو يروح .. الجمال الظاهري ممكن في لحظة يروح و ما يفضل الا الجمال الداخلي

جمال الروح .. جمال الأخلاق

الدين و الخلق هو أهم شي و بعدين الباقي

ابغى اوقف معاكم وقفات و ابغى اوصل لكم ليه كتبت دا الموضوع

معليش اتحملوني

1- حب الله عز و جل و هو أسما حب

2- حب الرسول و جميع الرسل

3- حب الصحابة

4- حب الوالدين

5- حب الاخوة و الأخوات

6- حب الصديق و الخليل [ نقف هنا وقفة ]

لازم نختار خليلنا صح ... خليل يعيننا على الطاعات .. نحبه لله .. يكون ناصح لنا و نكون ناصحين له

ما نختار خليلنا المغني الفلاني ... و العجيب الي يجعل المغني الفلاني و الممثلة الفلانية قدوة له ... معقول نكون ويصلنا لدرجة انو قدوتنا هو المطرب الفلاني و المطربة الفلانية

معنى الصداقة مو الكل يلاقيه و دائما اسمع ليه صديقتي الفلانية تركتني و ليه ما اعرف ايش

لأنو قلوبنا ما صارت لبعض و ما حبينا بعض لله

اي نعم انك تشكي لها و تعطيها اسرارك بس أقسم بالله لو جيتي لها بهم كبير و تبغي نصيحة لأنك في زلل ما راح تلاقي الصديقة الي تنصحك ... و راح تختفي الي كنتِ تتكلمي معها و تاكلي معها لحوم الناس و تعلو الضحكات

تخيلي لما تقابلي خليلتك في مكان من الأماكن و تتكلمي ورا هاد و دي لمدة 3 ساعات

خير من انك تجلسي معها ولو ربع ساعة تذكرو الله ؟! ... و تعتبروه مجلس ذكر يقول الله لكم ( قومو مغفورا لكم ) يا الله شوفو قد ايه اجور بنضيعها

مغفورا لنا مره وحدة !! .. يا الله احنا فين و متى نصحى

احكي لكم قصة صارت لي من كم اسبوع

شفت وحدة كنت اموت عليها ! ... تعرفو ايش يعني كنت اموت عليها ؟! .... و ما شفتها من مدة

طبعا كان اللقاء لقاء حار

جلست معها تقريبا ربع ساعة بس

بس ربع ساعة و حسيت في حاجات اتغيرت كتير لما قالت لي ( لا يا غبية لا تقولي كدا )

قلت لها لو كلمتيني بهادي الطريقة تاني ما راح اجلس معك

قالت لي .. أوووف .. لا يكون زعلتي ؟! ... عادي احنا صاحبات نقول كدا لبعض من باب المزح !!

الله أكبر ... صارت الصداقة انو نقول لبعض عبية و هبلة و ما اعرف ايش كمان ... السبات كتيرة

بعدها كان هذا فراق بيني و بينها بعد كدا صرت اتجنبها بكل الطرق

للأسف مفهوم الصداقة عندنا صار خربان .. للأسف الشديد

بختصار الحب احترام و اذا ضاع الاحترام ضاع الحب

اعطيكم مثال .. في شخصة اتأثرت فيها و للآن تجذبني بكلامها الرائع و اخلاقها الرائعة والهدوء الي فيها .... لما اجي أتكلم معها .. بعض الأحيان ما اقدر اطالع فيها ... اخجل أحط عيني بعينها احتراما و حبا لها
حتى بعض الأحيان أنسى ايش كنت ابغى اقول ... الكلام يطير

عشان كدا لازم نعرف احنا مين بنصادق

هاد الكلام بأقوله مو عشان هو الصح ( و هو الصح ) .. بس انا بأقول لكم اسألو مجرب و صدقوني الي يلاقي الصديق ذو الأخلاق الطيبة الي يعينه على الحق ما راح يرضى بغيره .... هادي هي الصديقة الي تنفعك اما غيرها ما راح ينفعوك ولا بهلة

( الاخلاء يومئذ بعضهم لبعض عدو الا المتقين )

نكمل ..

7- حب الزوج ... الخطيب .. الحبيب [ نقف هنا وقفة ]

حب الزوج ان كان لله فلكم الأجر

تخيلو حتى الزوجة اذا نظرت في زوجها لها اجر و ايضا الزوج اذا نظر في زوجته له الأجر بإذن الله

يا الله !! ... حتى النظرة لو كانت لله نأجر عليها !! .. سبحان الله !!

أما حب الحبيب الي ما تربطك فيه علاقة شرعية فهذا ما يصير ولازم نبعد عنه

طيب يا خديجة انتِ قلتي انو الحب شعور يضعه الله في قلوب العباد و انو القلوب مو بيدنا .. بيد الله و و و ... كيف طيب لو حبينا هاد مو بيدنا كيف تبغينا نبعد ؟ ... كيف تقولي كلام متناقض ؟

ايوه انا قلت و عارفة ايش بأقول و الكلام مو متناقض ابدا

الله و هو اعلم بالعباد .. يعرف انو قلوبنا ضعيفة فأعطانا ظوابط

أول شي أمرنا بغض البصر ( فالنظرة سهم من سهام ابليس )

كمان السمع .. الصوت الحلو يأثر في القلب

ممكن واحد يتعلق بوحدة لأنو صوتها جميل و ممكن توهمه انها ملكة جمال و ممكن كمان ما تعطيه عمرها الحقيقي

عشان كدا لما نسمع القرآن من شيخ صوته رائع يأثر في القلب و يمكن الدمعة تنزل مو مثل لما نسمعه من شيخ يكون صوته عادي

حتى الأغاني لما تكون من مطرب صوته رائع الا و ما تأثر في القلب ولا تقولو لي لا

طيب و لو جاتني وحدة و قالت لي انا اتخطيت هاد كلو و حبيت و متعلقة بحبيبي اعمل ايش ؟!

حأقول لها اتعالجي !

كيف ؟!

العلاج :

أولا : القناعة بأنو تقدري تبعدي عنه و تنسيه ... لا تقولي ما اقدر .. تقدري بس لازم تقتنعي بدا الكلام

ثانيا : ادعي الله و اطلبي من فضله انو يخرج دا الشخص من قلبك خروج لا رجعة اليه ... فالله الذي وضع حبه في قلبك هو القادر على ان يمحي حبه من قلبك إلى الأبد

ثالثا : الاستغفار و التقرب الى الله بالنوافل و الطاعات و هو اهم شيء في العلاج

ولازم تحطي ببالك و قدام طريقك قوله تعالى (( ومن يتقِ الله يجعل له مخرجا ))

و انو من ترك شيء لله عوضه الله خيرا منه

اختم كلامي بأنو حب الله هو أسما حب .. و هو الوحيد الذي يستحق الحب و الشكر اما الباقي فهم عباد لله

الله هو الوحيد القادر انو يشفينا و يبعد عننا الهم و الحزن اما البشر فما بيدهم شي

احنا للأسف صرنا نشكر البشر و ننسى نشكر رب البشر الي انعم علينا بكل هالنعم و كمان فوقها بنتذمر ... للأسف الشديد

اللهم ادخلنا جنتك

صلو على الحبيب رسولنا الكريم محمد صلى الله عليه و سلم

تحياتي القلبية

موضوع شيق يا خديجة و اكيد معك حق
الله يقوينا على الحب لان الحب ابتلاء من رب العالمين

يا الله كم كلامك جميل يا خديجة...حسيتها كلمات خرجت من قلبك تسلم افكارك الطيبة .انشاء الله نستفيد معك

» كلمات تعني الكثير ........ فقط لمن يفهمها !
» عيد الحب يا مالين الحب
» رسالة حب
» رسالة الي ......
» رسالة الى كل مبتلى....